Mat 1 | KYG | STEP | Yesu Kalaisi'a Nevini aginago ne'mo mai'nigeno Nevini'a Emalehamu aginago ne'mo mai'niye. Yesu Kalaisi aginago vaya'ai apaki'apimo hane'niye.

Matthew 1

Yesu Kalaisi aginago vaya'ai apaki'apimo hane'niya gemae

(Luk 3:23-28)

1 Yesu Kalaisi'a Nevini aginago ne'mo mai'nigeno Nevini'a Emalehamu aginago ne'mo mai'niye. Yesu Kalaisi aginago vaya'ai apaki'apimo hane'niye. 2 Emalehamu'a Aisiki'mo alino ate'nigeno Aisiki'a Yekopu'mo alino ate'nigeno Yekopu'a Yuta'e konaga'amogi'e'mo alino apate'nige'anae'mo 3 Yuta'e Tama'e'mo mago lago'ya mafa'nela'mo Pelesi'e Sila'e'mo ali'ana anate'na'ae. Ita'animo'mo Tama'a mai'niye. Pelesi'a Hesaloni'mo alino ate'nigeno Hesaloni'a Lama'mo alino ate'nigeno 4 Lama'a Aminatapi'mo alino ate'nigeno Aminatapi'a Nasoni'mo alino ate'nigeno Nasoni'a Salimoni'mo alino ate'nige'anae'mo 5 Salimoni'e Lehepi'e'mo Movasi'mo ali'ana ate'na'age'anae'mo Movasi'e Luti'e'mo Ometi'mo ali'ana ate'na'ageno Ometi'a Yesi'mo alino ate'nigeno 6 Yesi'a Nevini'mo ala ne'apimo yagaino ne'apateya kini ne'mo alino ate'nige'ana Nevini'e hogoteno Yulaiyate'mo mai'niya a kano'e'mo Salomoni'mo ali'ana ate'na'ageno 7 Salomoni'a Liyamoamu'mo alino ate'nigeno Liyamoamu'a Amaisa'mo alino ate'nigeno Amaisa'a Esa'mo alino ate'nigeno 8 Esa'a Yehosafati'mo alino ate'nigeno Yehosafati'a Yolamu'mo alino ate'nigeno Yolamu'a Asaiya'mo alino ate'nigeno 9 Asaiya'a Yotami'mo alino ate'nigeno Yotami'a Enasi'mo alino ate'nigeno Enasi'a Hesekaiya'mo alino ate'nigeno 10 Hesekaiya'a Manasa'mo alino ate'nigeno Manasa'a Emoni'mo alino ate'nigeno Emoni'a Yosaiya'mo alino ate'nigeno 11 Yosaiya'a Yekonaiya'e konaga'amogi'e'mo kame vaya'apimogi Isaleli vaya'mo apavaleli u'a Mamiloni kotegamo apate'naya afina'mo alino apate'niye.

12 Kame vaya'apimogimo apavaleli u'a Mamiloni kotegamo apate'nageno'ae'mo Yekonaiya'a Siyalitiyeli'mo alino ate'nigeno Siyalitiyeli'a Selamameli'mo alino ate'nigeno 13 Selamameli'a Amaita'mo alino ate'nigeno Amaita'a Elaiyakimi'mo alino ate'nigeno Elaiyakimi'a Eso'mo alino ate'nigeno 14 Eso'a Setoki'mo alino ate'nigeno Setoki'a Ekimi'mo alino ate'nigeno Ekimi'a Elaiyati'mo alino ate'nigeno 15 Elaiyati'a Eliyesa'mo alino ate'nigeno Eliyesa'a Matani'mo alino ate'nigeno Matani'a Yekopu'mo alino ate'nigeno 16 Yekopu'a Yosefe'mo Maliya anau'amo'mo alino ate'nigeno Maliya'a Yesu'mo Goti'a lekana paino ate'niya vekamo agi'amo Kalaisi'mo alino ate'niye.

17 Ani kava hu'a Emalehamu mafa'nelupati'mo afole ai'naya aginago vaya'mo fotini'a vaya'mo afole aite'a falite'a hume hume ne'ageno'ae'mo henaga'amo Nevini'a afole ai'niye. Nevini'a afole aitege'a ani kava hu'a fotini'a aginago vaya'mo afole aite'a falite'a hume hume ne'age'apae'mo Mamiloni kotegamo apavaleli u'a apate'nage'a mai'nae. Mamiloni kotega mai'naya afinateti'mo ani kava hu'a fotini'a aginago vaya'mo afole aite'a falite'a hume hume ne'ageno'ae'mo Kalaisi'a anile'mo afole ai'niye.

Maliya'a Yesu Kalaisi'mo alino ate'niya gemae

(Luk 2:1-7)

18 Yesu Kalaisi'a ita'amo'mo alino ate'niya kava'mo ina kava'mo huno afole ai'niye. Yosefe'a Maliya'mo lekana pai male'niya'monanafa agae'e'mo magokepi lokae'ana ohavae'na'ageno'ae'mo aote Auneme'amo'mo aipagu'mo ami'nigeno age'niye. 19 Yosefe'a Maliya'mo lekana pai male'niya vekamo alagepa ne'mo mai'niya'mofe'mo, ava gemo hisugeno avagage hisiyafe'mo o'nahau'niyanage'na afa'a ategauve, huno agesa afi'niye. 20 Agesamo afiteno, alagamuna ageyana Ala kava ne'mo enisole ne'amo agaetegamo emine'nigeno age'niye. Enisole ne'mo'a ha paino'ae'mo, Nevini aginago Yosefeyo, huno, aote Auneme'amo'mo aipagu'mo ami'niya'mofe'mo akamo Maliya'a alisanafe'mo koli osuvo. 21 Agaemo ve mafa'nemo alino atesigeno'ae'mo ani mafa'nemo'a vaya'amo hosu kavapati'mo apakufamo alino katino apategaiya'mofe'mo agi'amo Yesu'ae huka ato, huno ha pai'niye.

22 Ala kava ne'mo'a agaetegati gemo alinineno aeno hakalo huno hapa nepaiya vekamo avayafati'mo hu'niya gemo afole aisiyafe'mo ani kava'mo afole ai'niye. 23 Agaemo hapa paino'ae'mo,Ve'e'mo magokepi lokaeno ohavae'nisiya a'mafa'nemo'a aipagu'e'mo maiteno ve mafa'nemo alino ategaiye. Agi'amo Imaniyuveli'ae hu'a aegae, huno avo'mo kae male'niye. Imaniyuveli'ae agimo aepa'amo Goti'a lagae'e'mo magokepi lokaeno ne'maiye.

24 Yosefe'a aupati'mo he tino enisole ne'mo'a ha pai'niya gemo akame huno uno Maliya'mo ali'niya'monanafa 25 agae'e'mo magokepi lokaeno ohavaeno aote maime maime ne'egeno'ae'mo mafa'nemo alino ate'niye. Yosefe'a mafa'ne'amo agi'amo Yesu'ae, huno ate'niye.